Logo

श्वेतकाली मेलाका लागि काठमाडौँ महानगरले दियो २८ लाख


२२ फागुन ०७८ काठमाडौँ । काठमाडौं महानगरले श्वेतकाली १२ वर्षे मेलाका लागि २८ लाख दिने भएको छ ।
यस बर्ष चैत १४ गतेदेखि श्वेतकालीको १२ बर्षे मेला सुरु हुनेछ । मेलाका क्रममा उपत्यकासहित बनेपालगायत ठाउँमा गएर श्वेतकालीको नाच प्रदर्शन हुनेछ ।
महानगरले १२ बर्षे श्वेतकाली मेलाका लागि २८ लाख रुपैयाँ उपलब्ध गराउने छ । यसमध्ये मेयर शाक्यले नरदेवी श्री श्वेतकाली संरक्षण तथा व्यवस्थापन समाजलाई पेश्कीस्वरुप १६ लाख ८० हजार रुपैयाँको चेक प्रदान गर्नुभयो । त्यसै अवसरमा शाक्यले गुठीका मुल धामी एवम परम्परागत न्यतः टोलका पूर्व नाइके स्व. लक्ष्मीनारायण महर्जनको शालिक अनावरण गरेका थिए । काठमाडौँ महानगरका मेयर विद्यासुन्दर शाक्यले, काठमाडौँको इतिहास बचाएर जीवन्त सांस्कृतिक सहर बनाउने अभियानमा आफू निरन्तर लागिरहेको बताउनुभएको छ । महानगरको १८ नम्बर वडामा आयोजना गरिएको न्यतभुलु अजिमा (श्वेतकाली) मेलाका लागि आर्थिक सहयोग उपलब्ध गराउने तथा लक्ष्मीनारायण महर्जनको शालिक अनावरण गर्ने कार्यक्रममा मेयर शाक्यले यस्तो बताएका हुन् ।
कार्यक्रममा मेयर शाक्यले, समय र परिस्थितिले परम्परागत जात्रा, पर्व सञ्चालन गर्न खर्च बढेको बताउँदै खर्च नभएकैकारण कुनै पनि जात्रा पर्व रोकिन नदिने बताएका छन् ।
‘सम्पदा संरक्षणका लागि अहिले जति काम भएका छन् । हाम्रो क्षमताले त्योभन्दा धेरै गर्न सक्थ्यो ।’ निकायगत समन्वयमा समस्या भएको बताउँदै मेयर शाक्यले, पुरातत्व विभाग र गुठी संस्थानबाट आवश्यकताअनुसार सहयोग नपाएपछि स्रोत भएर पनि जीर्ण सम्पदाको संरक्षणमा काम गर्न नसकिएको उल्लेख गरे ।
त्यस क्रममा उपमेयर हरिप्रभा खड्गी श्रेष्ठले, स्थानीय सरकारको प्रमुख जिम्मेवारी स्थानीय भाषा, कला, साहित्य र सिर्जनाको संरक्षण गर्ने भएकोले त्यसैअनुसार काम भइरहेको बताएका थिए ।
गुठी परम्परालाई महानगरले गर्ने सहयोगका विषयमा कुरा गर्दै वडाध्यक्ष एवं सम्पदा तथा पर्यटन समितिका संयोजक न्हुच्छेकाजी महर्जनले यस्ता गुठी वडामा मात्र दर्ता भए पुग्ने बताए । शालिक निर्माणको सन्दर्भ उठाउँदै महर्जनले, १८ वडामा बसोबास भएका आर्थिक, सामाजिक, राजनीतिक तथा अन्य क्षेत्रमा उल्लेखनीय योगदान पु¥याउने व्यक्तित्वहरुको शालिक बनाउने काम भइरहेको जानकारी दिए । करिव २ लाख लागतमा लक्ष्मीनारायण महर्जनको शालिक बनाइएको हो । लक्ष्मीनारायणसँगै नारायण गोपाल, चित्तधर हृदय, शंखधर शाख्वालगायत व्यक्तित्वहरुको शालिक निर्माण भइरहेको उनको भनाइ थियो ।

 

प्रतिक्रिया दिनुहोस्