Logo

ललितपुरमा मतदाता शिक्षामा बेथिती, स्थानीय सञ्चारमाध्यमलाई बेवास्ता


ललितपुर खबर
२२ वैशाख ०७९, ललितपुर । निर्वाचन आयोगले मतदाता शिक्षाको गर्ने खर्च ठूला मिडियालाई पोस्ने र स्थानीय सञ्चारमाध्यमहरुलाई हेप्ने रणनीति अख्तियार गरेको पाइएको छ ।
यस वर्ष मितव्ययी स्थानीय निर्वाचन बनाउने भन्दै मतदाता शिक्षामा हुने खर्च कटौती गरेको आयोगले स्थानीय सञ्चारमाध्यमहरुलाई वेवास्ता गर्दै त्यो पैसा राष्ट्रिय स्तरका सञ्चारमाध्यमलाई विज्ञापन दिएको छ ।
ललितपुरमा मतदाता शिक्षाको नाममा आएको पैसा स्थानीय स्तरमा चलेका संचारमाध्यमहरुलाई वेवास्ता गर्दै ठूला सञ्चारमाध्यमहरुलाई विज्ञापन दिइएको हो ।
जिल्ला निर्वाचन कार्यालय ललितपुरकी प्रमुख गोमा धमलाले माउण्टेन टेलिभिजन, कृषि टेलिभिजन, कान्तिपुर एमएम, उज्यालो एमएमलगायतका देशभर पहुँच भएका सञ्चारमाध्यमहरुलाई मतदाता शिक्षाको लागि विज्ञापन दिइएको बताइन् । उनले भनिन्,‘आयोगले नै ठूला संचारमाध्यमलाई विज्ञापन दिनु भनेर पठायो । स्थानीय सञ्चारमाध्यमहरुलाई बजेट नै राखेको छैन ।’


प्रमुख धमलाका अनुसार स्थानीय १३ वटा पत्रपत्रिकालाई १० हजार तोकेर पठाइएको छ । यद्यपी ललितपुरमा नियमित प्रकाशन हुने पत्रत्रिका एक दुई वटा मात्रै छन् । उनले भनिन्, ‘स्थानीय अनलाइनलाई त बजेट नै छुट्याइएको छैन ।’
ललितपुरमा ललितपुर खबर, प्रणाम खबर, कलियुग न्युज, आधारभूमि, काठखबर र समानता नेपाललगायतका अनलाइन सक्रिय रुपमा स्थानीय समाचार पस्किरहेको छन् । यहाँका स्थानीय सञ्चारमाध्यमहरुमा स्थानीय पत्रकारहरु दिनरात काम गरेर सूचना र समाचार दिइरहेका छन् । तर ठूला भनिने संचारमाध्यमहरुमा ललितपुर आधार बनाएर काम गर्ने पत्रकारहरु समेत छैनन् ।
प्रमुख धमलाले स्थानीय अनलाइनहरुले छिटो र वास्वविक पाठकहरुबीच सूचना र समाचारहरु पु¥याउने कुरामा आफू सहमत भए पनि आयोगको निर्णय अनुसार आफू काम गर्न बाध्य रहेको बताइन् । उनले भनिन्, ‘मैले लेखेर पठाएको छु । सच्चिएर आए हामी स्थानीय सञ्चारमाध्यमहरु पनि समेट्छौं ।’
पत्रकार महासंघ ललितपुरका अध्यक्ष सागर न्यौपानेले आफूले जिल्ला निर्वाचन कार्यालयलाई सबै स्थानीय सञ्चारमाध्यमहरुको विवरण पठाएको बताए । उनले भने, ‘स्थानीय निर्वाचनमा स्थानीय संचारमाध्यमहरुको सहयोग लिएर निर्वाचन आयोग अघि बढ्नु पर्ने हो । हामी समन्वय गरेर यो कुरा सुधार गर्नेतर्फ लाग्छौं ।’

ललितपुर आधार बनाएर काम गर्ने पत्रकार सन्तोष दाहालले आयोगले ललितपुरको स्थानीय निर्वाचनमा स्थानीय सञ्चारमाध्यमहरुको भूमिकालाई नजरअन्दाज गर्नु दुखद भएको बताए । उनले भने, स्थानीय पत्रकारितालाई आयोगले अपमान गरेको हो । ललितपुर नबुझने कर्मचारी संयन्त्र हुँदा यस्तै हुन्छ ।
उनले ललितपुर पाटन शहर मात्रै नभई काँठ र २ वटा पालिका रहेको दक्षिण ललितपुरलाई सूसुचित गर्न स्थानीय अनलाइन सञ्चारमाध्यमहरुको ठूलो भुमिका छ । उनले भने, ‘स्थानीय स्तरमा निर्वाचनको वातावरण बनाउन स्थानीय सञ्चारमाध्यमहरुको ज्यादै ठूलो भूमिका छ ।’
अघिल्ला निर्वाचनहरुमा जस्तो आयोगले भोट हाल्ने तरिका सिकाउन आयोगले यस वर्ष सरकारी कर्मचारी खटाएको छैन । खर्च कटौती गर्ने भन्दै यो वर्ष आयोगले टोल टोलमा नमूना निर्वाचन पनि गरेन ।
आयोगले डिजिटल र सञ्चारमाध्यमको सहयोग लिने भन्दै मतदाता शिक्षा कार्यक्रम सुरु गरेको हो ।

प्रतिक्रिया दिनुहोस्