Logo

विदेशमा रहेका नेपालीको मताधिकार सुनिश्चित गराउन कांग्रेसको माग

७ असार ०७९, काठमाडौं । नेपाली कांग्रेसले मतदाता नामावली संकलनलाई सरल बनाउन र विदेशमा रहेका नेपालीको मताधिकार सुनिश्चित गराउन निर्वाचन आयोगको ध्यानाकर्षण गराएको छ ।
कांग्रेसका महामन्त्रीद्वय गगनकुमार थापा र विश्वप्रकाश शर्माले प्रमुख निर्वाचन आयुक्त दिनेश थपलियालाई भेटेर विदेशमा बस्नेहरुले पनि मत दिन पाउने व्यवस्था गर्न ध्यानाकर्षण गराएका हुन् ।

भेटमा संसदीय निर्वाचनका निम्ति मतदाता नामावली संकलनको कामलाई सहज बनाउन ध्यानाकर्षण गराइएको महामन्त्री थापाले जानकारी दिए ।

मताधिकारको प्रारम्भमै झमेला व्यहोरेपछि मताधिकारप्रति वितृष्णा बढाउने देखिएकाले सहज वातावरण बनाउनुपर्ने माग कांग्रेसले गरेको हो ।

भेटमा प्रमुख आयुक्त थपलियाले साउन दोस्रो सातादेखि विदेशमा रहेका नेपालीहरूको नामावली संकलन गर्ने जानकारी दिएका छन् । कांग्रेसले निर्वाचन आचारसंहितालाई कर्मकाण्डी मात्रै नभएर व्यवहारिक बनाउन पनि आयोगको ध्यानाकर्षण गराएको छ ।

प्रतिक्रिया दिनुहोस्