Logo

फुलचोकी जंगलमा हराएका चार विद्यार्थी ११ घण्टापछि फेला

२७  कात्तिक ०७९, काठमाडौं ।  शनिबार दिउँसोदेखि ललितपुरको फुलचोकी जंगलमा हराएका चार विद्यार्थी फेला परेका छन्। राष्ट्रिय निर्माण मावि मूलपानी काठमाडौंका कक्षा ११ र १२ का १२५ जना विद्यार्थी र ९ जना शिक्षक शनिबार फुलचोकी घुम्न गएका थिए।

बिहान ७ बजे गएका उनीहरु दिउँसो २ बजे फर्किने बेलामा चार जना विद्यार्थी सम्पर्कमा आएनन्। विद्यार्थी फेला नपरेपछि विद्यालयले साँझ ७ बजे प्रहरीलाई खबर गरेको थियो। प्रहरी निरीक्षक दीपक केसीको कमाण्डमा खटिएको २० जना प्रहरीको टोलीले राति १ बजे उजीहरुलाई फेला पारेको ललितपुर प्रहरीले जानकारी दिएको छ। उनीहरु छोटो बाटो हिँड्न खोज्दा जंगलमा हराएका थिए। दिनभरी शिक्षक र विद्यार्थीले खोजतलास गर्दा पनि फेला नपारेपछि प्रहरीलाई खबर गरेका थिए।

हराउनेमा खोटाङको बुईपाका नारायणकुमार भट्टराई, अर्घाखाँचीका अशोक विक, दोलखाका अर्जुन विक र मकवानपुरको हेटौडाका रमेश विष्ट रहेका छन्।

प्रतिक्रिया दिनुहोस्