Logo

चापागाँउ सडक कालोपत्र हुँदै

फाइल तस्विर

ललितपुर खबर
१२ मंसिर ०७९, चापागाँउ । ठेचो टाहाखेल सडकको कालोपत्र सुरु भएको छ ।
ललितपुरको ठेचोबाट आइतबार रातीदेखि कालोपत्र सुरु गरिएको हो । ठेकेदार कम्पनीले केही दिनभित्र टाहाखेलसम्मको सडक कालोपत्रे गरिने बताएको छ । ठेकेदार कम्पनीले ठेचोको धापाखेल दोवाटोबाट सडकको कालोपत्र निकाल्न सुरु गरेको छ ।
गोदावरी ११ का वडाध्यक्ष निलबहादुर देशारले ठेचोबाट झ्यालीपाटीसम्म पहिलो चरणमा कालोपत्र हुने बताए । उनले भने, ‘त्यसपछि टाहाखेलसम्मै कालोपत्र हुन्छ ।’
ट्राफिक प्रहरीले रात ९ बजेदेखि टिपरलाई कालोपत्र नहुन्जेलसम्मका लागि बन्द गरेको छ । नगरपालिकाले समेत सडक कालोपत्र गर्न अवरोध हुने भएकाले बैकल्पिक सडक प्रयोग गर्न सूचना प्रकाशन गरेको छ ।
नवजानकी जेभिले गत जेठमा चापागाँउ ज्योतीविहारदेखि चापागाँउ टुसालसम्म ढलान गरेको थियो ।
सडक विभागले २०७२ सालमा सडक विस्तारका लागि ठेक्का लगाएको भए पनि स्थानीयहरुको घरधनीलाई सरकारले मुआव्जा नदिएपछि कालोपत्र भएन । २०७६ सालमा ठेक्का अवधि सकिएपछि जनप्रतिनिधिहरुको पहलमा यो सडक विस्तार नगरि यथास्थितीमाकालोपत्र गरिएको थियो ।


कालोपत्र गरेको ६ महिनामै भत्कन सुरु भएको यो सडक आजकल हिड्नै नहुने गरि खाल्टा बनेको छ । दिनहुँ सयौं टिपर गुड्दा सडकले भार थाम्न नसकेको भन्दै सरोकारवालाहरुले टिपर बन्द गर्नु पर्ने आवाज उठाउने गरेका छन् । मापदण्डभन्दा धेरै निर्माण सामाग्री बोकेर गाडी गुड्ने हुँदा सडक चाडै विग्रेको उनीहरुको आरोप छ । ठेकेदार कम्पनी भने घर थर्केको भन्दै स्थानीय घरधनीले सडक पेल्दा रोलर नगाउन नदिएको कारण कालोपत्र नटिकेको बताउछन् ।
कालोपत्र गरेपछि स्थानीयले धारा जडान गर्न सडक खन्ने भएकाले पनि सडक चाडै विग्रने गरेको छ ।

प्रतिक्रिया दिनुहोस्